林峯飾演嘅景博，憑住豐富物理知識，再加上偵探頭腦，不時以物理學理論幫老友馬國明飾演嘅高級督察盧天恒，及盧的下屬胡諾言（左）、李成昌（左 二），拆解懸疑案件。
無綫嚟緊接《飛女正傳》播出嘅新劇《談情說案》，無論人物角色同劇情發展，絕大部分跟（為存忠厚，唔用抄襲）早排福山雅治主演嘅《神探伽利略》相 似。而林峯個角色同福山雅治一樣，都係大學物理系副教授，而楊怡女警角色就似足柴咲幸，都係有勇無謀嗰隻。
播映時間﹕ 5月 24日起 周一至周五晚上 9:30pm 翡翠及高清翡翠台
天下文章一大抄。咁樣講雖然好似好唔負責任咁，但既然連世博宣傳歌都係 copy日本女歌星岡本真夜 13年前嘅舊歌〈不變的你就好〉嘅話，咁坊間出現山寨版電視劇更係輕鬆平常。最緊要係抄得好好睇睇啫。
日劇《神探伽利略》入面飾演湯川學嘅係福山雅治。因為本身係大學物理學教授，而且亦富有偵探頭腦，所以佢嘅警界朋友、北村一輝飾演嘅草薙周不時搵 佢幫手破解奇難疑案。而無綫嘅《談情說案》，亦同樣標榜「以物理學理論拆解懸案」，飾演呢個天才物理學教授景博嘅就係「亞太區最受歡迎男歌手」嘅林峯。
林峯喺《談》入面飾演嘅景博，亦係受到死黨、重案組高級督察盧天恒（馬國明飾）嘅力邀，協助警方破好多單奇案，並且得馬嘅介紹而識到女探員徐小麗 （楊怡飾）。之後兩個自然互相有 feel啦。
《談》除咗林峯、楊怡同馬國明外，仲有好耐冇喺電視劇出現嘅廖碧兒，佢今次喺劇入面飾演記者凌敏嘉，同馬國明屬於有性冇愛嘅關係。
喺《談》入面，林峯認為自己對楊怡飾演嘅女探員小麗有 feel，全因一種名為「苯氨基丙酸」嘅愛情激素所致。而《神》嘅福山雅治亦同樣以物理程式分析同柴崎幸嘅曖昧關係（右圖）。
馬國明同廖碧兒飾演嘅敏嘉，雖處於有性無愛關係，但當廖同黃長興飾演嘅花弗機師 Adrian相好時，個心竟然有啲籮籮攣感覺。
名模 Lisa S喺《談》客串一角，飾演馬國明女朋友之一。
楊怡飾演嘅女探員，雖然夠膽識，有義氣，有「犀利妹」之稱，可惜衰衝動，影響咗判斷力。
| 
